मंडळाला सर्वच कार्यक्रम तिकीट लावून करणं शक्य नसतं. आणि ते बरोबर वाटणारही नाही आपल्याला. मंडळात आपण बसवतो त्या गणपतीच्या दर्शनाला आपण तिकीट लावू शकतो का? लहान मुलांचे कार्यक्रम करतो तेव्हा त्याला तिकीट लावणे योग्य आहे का? वर्षभरातले कितीतरी कार्यक्रम इथे सर्वांना पैसे न भरता पाहता येतात. तुम्ही स्वत: ते सगळेच्या सगळे कार्यक्रम बघाल असं नाही. पण आपले भाषा बांधव, त्यांचे कुटुंबीय हे कार्यक्रम बघू शकत असतात ते तुमच्या वर्गणीमुळे! गेल्या काही वर्षात सभागृहांचा, कार्यक्रमांचा खर्च खूपच वाढला आहे. जाहिराती, प्रायोजक आणून हा खर्च आपण वेळोवेळी भागविला तरी कायमस्वरुपी दूरगामी पायाभूत उपक्रमांसाठी सभासदांचा पाठिंबा आवश्यक असतो. महाराष्ट्राबाहेर मराठी माणसाला हक्काचं माहेरपण मिळावं ह्यासाठी जे जे शक्य आहे त्यावर मंडळ खर्च करत असते.

महाराष्ट्र मंडळ वेळोवेळी घेते त्या अनेक स्पर्धांमध्ये सभासदांना सहसा विनामूल्य प्रवेश असतो. मंडळाचे सभागृह / वास्तूतील इतर जागा सदस्यांना भाड्याने देताना शुल्कात सवलत दिली जाते. मंडळाच्या ऑफलाइन तसेच ऑनलाईन प्रकाशनांत जाहिरात द्यायची झाली तरी सभासदांना काही सूट असते. शक्य होईल तेव्हा तेव्हा काही कार्यक्रमांची तिकीटेही सदस्यांना कमी दरात मिळतात.

खरं तर मराठी माणूस दक्षिणेत उतरला त्याला तीनशे वर्षे होऊन गेली. पण आधुनिक महाराष्ट्रीयांचे मंडळ बेंगळूरुत स्थापन होऊनसुद्धा तब्बल शंभर वर्षे झाली. शंभर वर्षे म्हणजे जवळजवळ चार पाच पिढ्या! सुरुवात झाली एकोणिसाव्या शतकाच्या शेवटी जेव्हा महाराष्ट्रातून काही सर्व्हेयर इथे कामासाठी म्हणून आले. त्यांच्यापैकी कै. बापूराव जोशी आणि सहकाऱ्यांनी मंडळाची स्थापना केली. आपल्याकडे त्या वेळच्या पहिल्या सभेपासूनचा वृत्तांत अगदी लिखित स्वरूपात आहे. मंडळाची औपचारिक घटनाही आहे. संस्था नोंदणीकृत असून दरवर्षी ऑडिट होते आणि सर्व सभासदांची बैठक होऊन कार्यकारिणी निवडली जाते. मंडळाची स्वत:ची वास्तू शहरात अगदी मध्यवर्ती ठिकाणी आहे. सभासदांनी दिलेली वर्गणी आणि देणग्या यामुळेच मंडळाचे कार्य इतके वर्ष चालू शकले. म्हणून बंगलोरमध्ये राहणारे सगळे मराठी या संस्थेचे हितचिंतक असायला हवेत आणि आहेतच. तुम्हीही सामील व्हावे असे आम्हाला अगदी मनापासून वाटते.